აღმოსავლეთ ევროპის უნივერსიტეტმა (EEU) 2024 წლის 12-16 სექტემბერს ჩინეთში, ქ. პეკინში გამართულ CIFTIS 2024 საერთაშორისო გამოფენაში მიიღო მონაწილეობა. CIFTIS (China International Fair For Trade In Service) გამოფენა არის ერთ-ერთი უდიდესი გამოფენა და მოიცავს 9 ძირითად მიმართულებას, მათ შორის განათლება, მედიცინა, ინჟინერია, ფინანსები, კულტურა და ტურიზმი, სპორტი, მედია და გარემოსდაცვა. გამოფენაზე 80-ზე მეტი ქვეყანა იყო წარმოდგენილი და 900,000-ზე მეტ ვიზიტორს მასპინძლობდა.
აღმოსავლეთ ევროპის უნივერსიტეტის სახელით CIFTIS 2024 გამოფენაში მონაწილეობა მიიღეს უნივერსიტეტის რექტორმა, კახაბერ ლაზარაშვილმა და განათლების მეცნიერებების ფაკულტეტის დეკანმა, ქეთევან აფთარაშვილმა. გამოფენაზე აღმოსავლეთ ევროპის უნივერსიტეტის რექტორი სპეციალური სტუმრის სტატუსით იყო მოწვეული და როგორც ქართული მხარის წარმომადგენელი, CIFTIS 2024 -ის გამოფენის გახსნაზე მისასალმებელი სიტყვით წარსდგა. საკუთარ სიტყვაში პროფესორმა კახაბერ ლაზარაშვილმა ხაზი გაუსვა სამომავლო თანამშრომლობის გაძლიერების შესაძლებლობებს, კულტურათაშორისი სასწავლო გარემოს შექმნას, საგანმანათლებლო რესურსების გაზიარებას, კვლევითი მიმართულებით ურთიერთთანამშრომლობასა და სხვადასხვა სფეროში გაცვლითი პროგრამების ხელშეწყობას.
ქ. პეკინში გამართულ გამოფენაზე EEU-ს წარმომადგენლებმა მონაწილეებს გააცნეს უნივერსიტეტის საგანმანათლებლო პროგრამები, უპირატესობები და შეთავაზებები. შეხვედრები გამართეს დაინტერესებულ პირებთან და სხვადასხვა ადგილობრივ ორგანიზაციებთან. გამოფენა მნიშვნელოვანი იყო მონაწილეებისთვის საქართველოს უმაღლესი საგანმანათლებლო დაწესებულების უფრო ახლოს გაცნობის, კულტურისა და გამოცდილების გაზიარებისა და პარტნიორული ურთიერთობების დამყარების შესაძლებლობების კუთხით.
გამოფენის დახურვის საზეიმო ცერემონიაზე აღმოსავლეთ ევროპის უნივერსიტეტს გამოფენის ორგანიზატორებისაგან Excellent Exhibitor-ის ჯილდო გადაეცა.
